प्रशासनाचा आदेश धाब्यावर! हडसणीत साखर कारखान्याकडून गायरान जमिनीवर डल्ला; तहसीलदारांच्या स्थगितीनंतरही भिंतीचे काम सुरूच

निलेश गायकवाड | तुषार कांबळे | हदगाव : हदगाव तालुक्यातील मौजे हडसणी येथे सार्वजनिक गायरान जमिनीवर साखर कारखान्याने अनधिकृतपणे अतिक्रमण केल्याचा गंभीर प्रकार समोर आला आहे. विशेष म्हणजे, माननीय तहसीलदारांनी या कामाला स्थगिती दिली असतानाही, प्रशासकीय आदेशाला केराची टोपली दाखवत कारखान्याने अतिक्रमणाची भिंत उभारली आहे. या प्रकारामुळे हदसणीतील ग्रामस्थ आक्रमक झाले असून परिसरात तणावाचे वातावरण निर्माण झाले आहे.

प्रशासनाचा आदेश जुगारला
गावातील जनावरांच्या चराईसाठी राखीव असलेल्या गायरान जमिनीवर साखर कारखान्याने आपले हक्क सांगत अतिक्रमण सुरू केले आहे. या विरोधात ग्रामस्थांनी आवाज उठवल्यानंतर महसूल विभागाने या प्रकरणाची दखल घेतली होती. हदगाव तहसीलदारांनी सदर कामाला स्थगिती देण्याचे अधिकृत आदेश दिले होते. मात्र, कारखान्याच्या व्यवस्थापनाने या स्थगिती आदेशाला न जुमानता रातोरात अतिक्रमणाची भिंत उभारल्याने प्रशासनाच्या कार्यक्षमतेवरही प्रश्नचिन्ह उपस्थित केले जात आहे.

युवासेनेचा आंदोलनाचा पवित्रा
या प्रकरणाचे गांभीर्य ओळखून युवा सेना जिल्हाप्रमुख संदेश पाटील हडसणीकर यांनी ग्रामस्थांसह तहसीलदारांची भेट घेतली आणि लेखी तक्रार दाखल केली. “कारखान्याने त्यांच्या मालकीच्या जागेत खुशाल काम करावे, मात्र सार्वजनिक गायरान जमिनीवर बेकायदेशीर ताबा मिळवू नये. ही जमीन सार्वजनिक मालमत्ता असून तिचे संरक्षण करणे ही प्रशासनाची जबाबदारी आहे. जीव गेला तरीही चालेल पण हे अतिक्रमण कारखान्याला करू देणार नाही.” अशी ठाम भूमिका संदेश पाटील यांनी मांडली आहे.

ग्रामस्थांचा रोष
“आमच्या हक्काची गायरान जमीन कारखान्याच्या घशात घालू देणार नाही,” असा पवित्रा हडसणीकरांनी घेतला आहे. प्रशासनाने तात्काळ हस्तक्षेप करून ही अनधिकृत भिंत पाडावी आणि गायरान जमीन मोकळी करावी, अशी मागणी ग्रामस्थांकडून केली जात आहे. आता या प्रकरणावर हदगावचे महसूल प्रशासन काय कारवाई करते, याकडे संपूर्ण जिल्ह्याचे लक्ष लागले आहे.