तुषार कांबळे ! हदगाव प्रतिनिधी!
हदगाव तालुक्यातील हरडफ फाटा ते हरडफ या मार्गावरील खड्डे गेल्या महिन्यात बुजवण्यात आले होते. मात्र हे काम अत्यंत थातूरमातूर पद्धतीने केल्याचा आरोप स्थानिक नागरिकांनी केला असून अवघ्या एका महिन्यातच पुन्हा खड्डे उघड झाल्याने रस्त्याची अवस्था जैसे थे झाली आहे. परिणामी, वाहनधारकांना जीव मुठीत धरून प्रवास करावा लागत आहे.
सदर रस्ता हा मुख्यमंत्री ग्राम सडक योजना अंतर्गत सुमारे दोन कोटी रुपये खर्चुन तयार केला होता. या रस्त्याची पाच वर्षांची देखभाल जबाबदारी संबंधित ठेकेदाराकडे आहे. सध्या देखभाल कालावधी सुरू असतानाही रस्त्यावरील खड्डे निकृष्ट दर्जाच्या पद्धतीने बुजवण्यात आल्याने नागरिकांमध्ये संताप व्यक्त होत आहे.
स्थानिकांच्या म्हणण्यानुसार, सुमारे चार किलोमीटर लांबीच्या रस्त्यासाठी केवळ दोन टाक्या डांबर वापरून खड्डे बुजवण्यात आले. त्यामुळे डांबर व्यवस्थित न चिकटल्याने एका महिन्यातच पुन्हा खड्डे पडले आहेत. दरम्यान, काही दिवसांपूर्वी संबंधित योजनेचे अधिकारी रस्त्याची पाहणी करण्यासाठी आले होते. मात्र त्यांनी प्रत्यक्ष स्थितीची सखोल तपासणी न करता परत गेल्याची चर्चा आहे. त्यामुळे खड्ड्यांची दैनिय दुरावस्था त्यांच्या निदर्शनास आली नसल्याचे नागरिकांचे म्हणणे आहे.
सदर रस्त्यावरील सर्व खड्डे दर्जेदार पद्धतीने कायमस्वरूपी बुजवावेत, तसेच संबंधित कामाची सखोल चौकशी करून जबाबदार ठेकेदार यांच्यावर कारवाई करावी, अशी मागणी हरडफ येथील नागरिकांकडून होत आहे.
## सत्यप्रभा न्यूज नांदेड ##
