मुंबई दि. ४ फेब्रुवारी : आपल्या आक्रमक राजकीय शैलीसाठी आणि रोखठोक भाषणांसाठी ओळखले जाणारे भारतीय जनता पक्षाचे आमदार गोपीचंद पडळकर सध्या एका वेगळ्याच कारणाने चर्चेत आले आहेत. राजकारणापलीकडे जाऊन त्यांनी आपली एक वेगळी कलात्मक बाजू लोकांसमोर मांडली असून, त्यांचे ‘होळकरशाही’ हे नवीन गाणे सध्या सोशल मीडियावर प्रचंड व्हायरल होत आहे.
२ फेब्रुवारी २०२६ रोजी गोपीचंद पडळकर यांचे “आमच्या नादाला लागण्याआधी… एकदा होळकरशाही आठवा” हे नवीन गाणे प्रदर्शित करण्यात आले. हे गाणे प्रदर्शित होताच नेटकऱ्यांनी त्याला जोरदार प्रतिसाद दिला आहे. विशेष म्हणजे, हे पडळकर यांचे पहिलेच गाणे नसून, यापूर्वीही त्यांची दोन गाणी प्रेक्षकांच्या भेटीला आली आहेत. हे त्यांचे तिसरे गाणे आहे. नेहमी राजकीय आखाड्यात विरोधकांवर घणाघाती टीका करणारे पडळकर या गाण्याच्या माध्यमातून एका नव्या रूपात समोर आले आहेत, ज्यामुळे त्यांच्यातील सर्जनशील आणि सांस्कृतिक पैलूंचे दर्शन घडत आहे.
या गाण्याचे वैशिष्ट्य म्हणजे या गाण्यात स्वतः गोपीचंद पडळकर यांनी मुख्य भूमिका साकारली आहे. गाण्याचे बोल सचिन माळी यांनी लिहिले असून, हे बोल पडळकरांनी स्वतःच्या अंदाजात सादर केले आहेत. तसेच, गाण्याचे संगीत आणि गायन मिलिंद शिंदे, शीतल साठे आणि अनिकेत मोहिते यांनी केले आहे. गाण्याचा व्हिडिओ अतिशय प्रभावीपणे चित्रीत करण्यात आला असून, पडळकर यांचा अभिनय पाहून त्यांचे चाहते भारावून गेले आहेत.
सोशल मीडियावर या गाण्याने अक्षरशः धुमाकूळ घातला आहे. गाणे रिलीज झाल्यानंतर अवघ्या २४ तासांच्या आत या व्हिडिओला दीड लाखांहून अधिक व्ह्यूज मिळाले आहेत, ज्यावरून या गाण्याची लोकप्रियता लक्षात येते. पडळकरांच्या चाहत्यांनी आणि समर्थकांनी कमेंट्सचा पाऊस पाडत त्यांच्या या नव्या प्रयत्नाचे भरभरून कौतुक केले आहे. एका चाहत्याने तर “बॉलीवूडमधील हिरोपेक्षाही आमचा हिरो भारी आहे,” अशा शब्दांत त्यांची स्तुती केली आहे, तर काहींनी त्यांना “संघर्ष योद्धा” असे संबोधले आहे.
दुसरीकडे, सोशल मीडियाच्या जगात नेहमीप्रमाणे संमिश्र प्रतिक्रियाही उमटत आहेत. काही नेटकऱ्यांनी या गाण्यावरून त्यांची खिल्लीही उडवली आहे. काही उपहासात्मक कमेंट्समध्ये “काय हे.. अगरबत्ती.. उदबत्ती..” असे म्हणत काहींनी गाण्याची चेष्टाही केली आहे. असे असले तरी, गोपीचंद पडळकर यांच्या या ‘होळकरशाही’ गाण्याची चर्चा सध्या सर्वत्र रंगली आहे आणि कमी कालावधीत मिळालेल्या प्रचंड प्रतिसादाने हे गाणे सोशल मीडियावर ट्रेंड करत आहे.
