पुणे दि.६ फेब्रुवारी : राज्याचे उपमुख्यमंत्री अजित पवार यांच्या दुर्दैवी निधनाला आता आठवडा उलटून गेला आहे. २८ जानेवारी रोजी मुंबईहून बारामतीला जाणाऱ्या त्यांच्या विमानाला भीषण अपघात होऊन त्यात अजित पवार यांच्यासह पाच जणांचा मृत्यू झाला होता. या घटनेने संपूर्ण महाराष्ट्र हळहळत असतानाच आता राष्ट्रीय समाज पक्षाचे अध्यक्ष आणि माजी मंत्री महादेव जानकर यांनी या संदर्भात एक अत्यंत धक्कादायक आणि थरारक माहिती समोर आणली आहे.
महादेव जानकर यांनी दिलेल्या माहितीनुसार, ज्या दिवशी हा भयंकर अपघात झाला, त्या दिवशी ते स्वतः अजित पवार यांच्यासोबत याच विमानातून प्रवास करणार होते. या प्रवासाचे नियोजनही झाले होते. अपघाताच्या काही दिवस आधीच त्यांची अजितदादांशी चर्चा झाली होती आणि त्यांनी निवडणूक प्रचारासाठी एकत्र बारामतीला जाण्याचे ठरवले होते. मात्र, नियोजित वेळेवर महादेव जानकर यांना मुंबईत पोहोचण्यास काही कारणास्तव उशीर झाला. या विलंबामुळे त्यांना वेळेवर पोहोचता आले नाही आणि त्यामुळेच ते अजित पवारांसोबत त्या विमानात जाऊ शकले नाहीत.
या घटनेचा थरारक अनुभव सांगताना जानकर म्हणाले की, “त्या दिवशी मी सुद्धा त्याच विमानात असणार होतो, परंतु मुंबईत उशिरा पोहोचल्यामुळे माझा प्रवास टळला आणि केवळ नियतीमुळेच माझे प्राण वाचले.” जर ते वेळेत पोहोचले असते, तर आज ते देखील त्या अपघातग्रस्त विमानात असते, अशी भावना त्यांनी बोलून दाखवली.
या अपघाताच्या संदर्भात प्राथमिक तपासातून समोर आलेल्या माहितीनुसार, त्या दिवशी दाट धुक्यामुळे दृश्यमानता अत्यंत कमी होती, तसेच विमानात तांत्रिक बिघाड झाल्याने ही दुर्घटना घडली. बारामती येथील विमानतळाच्या धावपट्टीपासून अवघ्या ५० मीटर अंतरावर असताना हे विमान कोसळले. या अपघातात अजित पवार यांच्यासह त्यांचे सुरक्षा रक्षक विदीप जाधव, फ्लाईट अटेंडंट पिंकी माळी, कॅप्टन सुमित कपूर आणि को-पायलट शांभवी पाठक यांचा दुर्दैवी अंत झाला. महादेव जानकर यांनी अजितदादांच्या आठवणींना उजाळा देत, त्यांच्या जाण्याने राज्याचे कधीही न भरून निघणारे मोठे नुकसान झाल्याची खंत व्यक्त केली आहे.
