मुंबई दि.६ फेब्रुवारी: एकोणीस वर्षांखालील (U-19) विश्वचषक स्पर्धेचा थरार सध्या शिगेला पोहोचला असून, भारत आणि इंग्लंड यांच्यात अंतिम सामना रंगला. या महामुकाबल्यात भारताचा युवा फलंदाज वैभव सूर्यवंशी याने आपल्या आक्रमक आणि स्फोटक फलंदाजीने सर्वांचे लक्ष वेधून घेतले आहे. त्याच्या या झंझावाती खेळीने केवळ भारतीय चाहत्यांनाच नव्हे, तर जगभरातील क्रिकेट जाणकारांनाही थक्क केले आहे. या दरम्यान, सोशल मीडियावर नेहमीच आपल्या हटके शैलीसाठी ओळखल्या जाणाऱ्या ‘आईसलँड क्रिकेट’ बोर्डाने (Iceland Cricket) वैभवच्या फलंदाजीवर दिलेली प्रतिक्रिया सध्या सर्वत्र चर्चेचा विषय ठरली आहे. वैभवची धुलाई पाहून आईसलँड क्रिकेटने चक्क त्याच्या ‘अटके’ची मागणी केली आहे.
वैभव सूर्यवंशीने अंतिम सामन्यात इंग्लंडच्या गोलंदाजांचा खरपूस समाचार घेत चौफेर फटकेबाजी केली. त्याची ही फलंदाजी पाहून आईसलँड क्रिकेट बोर्डाने आपल्या अधिकृत सोशल मीडिया हँडलवरून एक मजेशीर पोस्ट शेअर केली. यामध्ये त्यांनी वैभवच्या फलंदाजीचे वर्णन करताना म्हटले की, “कोणीतरी या वैभव सूर्यवंशीला आताच्या आता अटक करा. क्रिकेटच्या मैदानावर इंग्लंडच्या गोलंदाजांविरुद्ध त्याने चालवलेली ही हिंसा ‘एक्स-रेटेड’ (X-rated) स्वरूपाची आहे.”
आईसलँड क्रिकेट बोर्ड हे सोशल मीडियावर आपल्या विनोदी आणि उपरोधिक टिप्पण्यांसाठी प्रसिद्ध आहे. वैभव सूर्यवंशीच्या बाबतीतही त्यांनी केलेली ही मागणी गंभीर नसून, ती त्याच्या उत्कृष्ट कामगिरीला दिलेली एक आगळीवेगळी दाद आहे. वैभवने ज्या ताकदीने आणि आक्रमकतेने इंग्लंडच्या गोलंदाजीला फोडून काढले, त्याचे कौतुक करण्यासाठीच त्यांनी ‘अटक’ आणि ‘हिंसा’ यांसारख्या शब्दांचा वापर केला. वैभवच्या या वादळी खेळीने भारताला सामन्यात मजबूत स्थितीत आणून ठेवले असून, त्याच्या या कामगिरीचे सोशल मीडियावर प्रचंड कौतुक होत आहे.
