मुंबई दि.२० फेब्रुवारी: राष्ट्रवादी काँग्रेस (शरदचंद्र पवार) पक्षाचे विद्यमान खासदार डॉ. अमोल कोल्हे यांनी राज्याच्या राजकारणात खळबळ उडवून देणारा एक मोठा दावा केला आहे. राज्याचे मंत्री आणि ज्येष्ठ नेते छगन भुजबळ यांची राज्यसभेवर वर्णी लागणार होती आणि याबाबतची माहिती खुद्द दिवंगत उपमुख्यमंत्री अजित पवार यांनीच दिली होती, असा महत्त्वपूर्ण गौप्यस्फोट अमोल कोल्हे यांनी केला आहे.
राज्याचे दिवंगत उपमुख्यमंत्री अजित पवार यांच्या दुर्दैवी निधनानंतर दोन्ही राष्ट्रवादी काँग्रेस गटांचे (अजित पवार गट आणि शरद पवार गट) पुन्हा विलीनीकरण होणार असल्याच्या चर्चांना राजकीय वर्तुळात मोठे उधाण आले होते. या एकत्रीकरणाच्या मुद्द्यावर विविध नेत्यांकडून संमिश्र प्रतिक्रिया येत होत्या. पक्षातील काही दिग्गज नेत्यांनी या चर्चा फेटाळून लावल्या, तर शरद पवार गटाच्या काही नेत्यांनी अजित पवारांसोबत या विषयावर प्रत्यक्ष चर्चा झाल्याचा दावा केला होता. स्वतः खासदार अमोल कोल्हे यांनीही अजितदादांसोबत विलीनीकरणाच्या अनुषंगाने तब्बल १४ बैठका झाल्याचे स्पष्ट केले होते. मात्र, आता या चर्चांना काहीही महत्त्व उरले नसल्याचा प्रश्न त्यांनी उपस्थित केला आहे. याच विलीनीकरणाच्या मुद्द्यावर छगन भुजबळ यांनी ‘एकत्रीकरणासाठी कोणतीही घाई करण्याची गरज नाही’ अशी सावध भूमिका मांडली होती. यानंतर अमोल कोल्हे यांना भुजबळांबद्दल प्रश्न विचारला असता, त्यांनी हा मोठा खुलासा केला.
सध्या महाराष्ट्रात आगामी राज्यसभेच्या सात जागांसाठी निवडणूक प्रक्रिया पार पडणार आहे. विधानसभेतील सध्याचे संख्याबळ आणि राजकीय गणित लक्षात घेता, महाविकास आघाडीला (मविआ) या निवडणुकीत केवळ एकाच जागेवर समाधान मानावे लागणार आहे. तर दुसरीकडे, सत्ताधारी महायुतीचे तब्बल सहा उमेदवार सहज निवडून येतील अशी दाट शक्यता वर्तवली जात आहे. याच आगामी राज्यसभा निवडणुकीच्या पार्श्वभूमीवर अमोल कोल्हे यांनी भुजबळांच्या उमेदवारीबाबत भाष्य केले आहे.
काय म्हणाले अमोल कोल्हे?
अमोल कोल्हे यांनी आपली भूमिका सविस्तरपणे मांडताना सांगितले की, “छगन भुजबळ हे राज्यातील अत्यंत मोठे आणि वजनदार नेते आहेत. त्यामुळे त्यांच्या मनात सध्या जो काही संताप किंवा त्रागा आहे, तो मी नक्कीच समजू शकतो. सद्यस्थितीत देशात जेव्हा जातनिहाय जनगणनेचा मुद्दा अतिशय संवेदनशील बनला आहे आणि त्यातही ओबीसी प्रवर्गासाठी जनगणनेत स्वतंत्र रकाना (कॉलम) उपलब्ध नाही, अशा महत्त्वपूर्ण आणि नाजूक काळात छगन भुजबळ यांच्यासारख्या ज्येष्ठ तसेच अनुभवी नेत्याची देशाच्या संसदेत उपस्थिती असणे अत्यंत गरजेचे होते. आमच्या नेत्यांमध्ये याआधी ज्या काही प्राथमिक स्वरूपाच्या बैठका आणि चर्चा झाल्या होत्या, त्यामध्ये एकदा स्वतः अजितदादांनी आम्हाला ओघाओघात सांगितले होते की, कदाचित छगन भुजबळ यांना राज्यसभेवर पाठवले जाईल. अशी आमची एक अंतर्गत पातळीवर चर्चा झाली होती.”
पुढे बोलताना खासदार कोल्हे यांनी सूचक विधान केले. ते म्हणाले, “सध्या समाजातील तळागाळातील प्रश्नांची एवढी सखोल जाण असणारा एखादा अभ्यासू नेता संसदेत जाण्याऐवजी, चक्क कोट्यवधी रुपये घेऊन केवळ निवडणुकांची रणनीती विकणाऱ्या व्यक्तीला राज्यसभेवर पाठवण्याची चर्चा राजकीय वर्तुळात रंगत आहे. कदाचित याच मुख्य कारणामुळे छगन भुजबळ हे सध्या अस्वस्थ झालेले असू शकतात. अर्थात, मला यातील सविस्तर कल्पना नाही, कारण हा पूर्णपणे त्यांच्या पक्षाचा आणि त्यांचा अंतर्गत विषय आहे. दुसरी एक महत्त्वाची बाब म्हणजे, राज्यसभेच्या या उमेदवारीच्या चर्चेत छगन भुजबळ यांना सामावून का घेतले गेले नाही? हादेखील त्यांचाच अंतर्गत प्रश्न आहे. त्यामुळे त्यांच्या पक्षाच्या या अंतर्गत विषयावर मी विनाकारण भाष्य करणे किंवा अधिक बोलणे अजिबात योग्य ठरणार नाही.”
‘मंगलाष्टका रिटर्न्स’मधून २३ मे रोजी उलगडणार सुलट प्रेमाची उलट गोष्ट!
