दिल्ली दि.४ फेब्रुवारी : लिबियाचे माजी हुकूमशहा मुअम्मर गद्दाफी यांचे पुत्र सैफ-अल-इस्लाम गद्दाफी यांची गोळ्या झाडून हत्या करण्यात आल्याची धक्कादायक घटना समोर आली आहे. ते ५३ वर्षांचे होते. सैफ-अल-इस्लाम यांच्या पक्षाच्या प्रमुखांनी त्यांच्या मृत्यूच्या वृत्ताला दुजोरा दिला आहे. या हत्येबाबत सध्या दोन वेगवेगळे दावे केले जात असून, त्यामुळे लिबियातील राजकीय वातावरण पुन्हा एकदा अस्थिर होण्याची शक्यता निर्माण झाली आहे.
हत्येबाबत दोन भिन्न दावे
सैफ-अल-इस्लाम यांच्या मृत्यूबद्दल दोन वेगवेगळ्या प्रकारची माहिती समोर येत आहे. ‘एएफपी’ या वृत्तसंस्थेला त्यांच्या वकिलांनी दिलेल्या माहितीनुसार, लिबियातील जिंतान शहरामध्ये सैफ-अल-इस्लाम यांच्या घरात चार अज्ञात इसमांनी जबरदस्तीने प्रवेश केला आणि त्यांच्यावर गोळ्या झाडून त्यांची हत्या केली. वकिलांच्या म्हणण्यानुसार, हा हल्ला का करण्यात आला आणि हल्लेखोर कोण होते, याबाबत अद्याप स्पष्ट माहिती मिळालेली नाही. मात्र, हा हल्ला एक पूर्वनियोजित कट असल्याचा संशय त्यांनी व्यक्त केला आहे.
दुसरीकडे, या घटनेबाबत एक वेगळाच दावा देखील समोर आला आहे. सैफ-अल-इस्लाम यांच्या बहिणीच्या हवाल्याने लिबियातील एका स्थानिक टीव्ही चॅनलने दिलेल्या माहितीनुसार, त्यांचा मृत्यू घरात झाला नसून लिबिया आणि अल्जेरियाच्या सीमेवर झाला आहे. या दोन वेगवेगळ्या दाव्यांमुळे त्यांच्या मृत्यूचे गूढ वाढले आहे.
अध्यक्षीय निवडणुकीसाठी होते इच्छुक
गद्दाफी यांच्या राजवटीचा अंत झाल्यानंतर लिबियाची विभागणी विविध मिलिशिया गटांमध्ये झाली असून, देशात दोन वेगवेगळ्या गटांचे वर्चस्व आहे. अशा परिस्थितीतही सैफ-अल-इस्लाम राजकारणात सक्रिय होण्याचा प्रयत्न करत होते. २०२१ मध्ये त्यांनी लिबियाच्या राष्ट्राध्यक्षपदाची निवडणूक लढवण्याची घोषणा केली होती. ते या पदासाठी उत्सुक होते, परंतु देशातील अस्थिर परिस्थितीमुळे निवडणुका पुढे ढकलण्यात आल्या होत्या. त्यांच्या अचानक झालेल्या मृत्यूमुळे लिबियाचे राजकारण अधिकच अस्थिर बनले आहे.
कायदेशीर लढाई आणि पार्श्वभूमी
त्रिपोली येथील एका न्यायालयाने २०१५ मध्ये सैफ-अल-इस्लाम यांच्या अनुपस्थितीत त्यांना मृत्युदंडाची शिक्षा सुनावली होती. मात्र, त्यानंतर २०१७ मध्ये त्यांना माफी कायद्यांतर्गत माफी देण्यात आली होती. लिबिया हा एक तेलसंपन्न देश असून, एकेकाळी सैफ-अल-इस्लाम यांचा दबदबा त्यांचे वडील मुअम्मर गद्दाफी यांच्या इतकाच होता. २०११ मध्ये गद्दाफी यांचे सरकार पडले. त्या काळात सरकारविरोधी आंदोलने दडपल्याचा आरोप सैफ-अल-इस्लाम यांच्यावर करण्यात आला होता, ज्यामुळे त्यांना सहा वर्षांचा तुरुंगवासही भोगावा लागला होता. मुअम्मर गद्दाफी यांनी १९६९ ते २०११ पर्यंत लिबियावर राज्य केले होते, परंतु २०११ मधील जनतेच्या उठावानंतर त्यांच्या राजवटीचा अंत झाला.
