नांदेड,११ जुन :- महाराष्ट्र शासनाच्या नगरविकास विभागाने दिनांक १० जून २०२५ रोजी काढलेल्या आदेशानुसार “ड” वर्ग महापालिकांची प्रभाग रचना करण्याचे निर्देश दिलेले आहेत. त्याअनुषंगाने मनपा आयुक्त तथा प्रशासक डॉ. महेशकुमार डोईफोडे यांनी महापालिकेच्या निवडणूक विभागाचा आढावा दिनांक ११जून २०२५ जी आयोजित बैठकीत घेतला.
सन 2०२२ चा महाराष्ट्र अधिनियम क्र.21 दिनांक 11.03.2022 नुसार पालिका सदस्यांच्या निवडणूकीच्या प्रयोजनासाठी प्रत्येक शहर ज्या प्रभागात विभागले जाईल त्या प्रभागांची संख्या व सीमा राज्य शासन, राज्य निवडणूक आयुक्तांच्या मान्यतेने अशी अधिसूचनेद्वारे वेळोवेळी विनिर्दिष्ट करील अशी तरतूद करण्यात आलेली आहे. त्याअनुषंगाने महापालिकेची प्रभाग रचना राज्य शासन, राज्य निवडणूक आयुक्त यांच्या मान्यतेने करावयाची असल्याबाबत आयुक्त यांनी यावेळी सांगितले.
तसेच सन 2022 चा महाराष्ट्र अधिनियम क्र.४३ , दिनांक 08.09.2022 अन्वये कलम 5 नुसार महापालिकेमध्ये निवडून द्यावयाच्या सदस्यांची किमान व कमाल संख्या निश्चित करण्याच्या सूचना दिलेल्या आहेत.तसेच सन 2024 चा महाराष्ट्र अधिनियम क्र.23, दिनांक 18.03.2024 अन्वये महापालिकांच्या सार्वत्रिक निवडणूकांच्या बाबतीत, प्रत्येक प्रभागातून शक्य असेल तेथवर चार पालिका सदस्य, परंतू तीनपेक्षा कमी नाहीत व पाच पेक्षा अधिक नाहीत एवढे पालिका सदस्य निवडून देण्यात येतील अशी तरतूद करण्यात आली आहे. या तरतूदीनुसार नांदेड वाघाळा शहर महापालिकेची प्रारुप रचना करण्यात येईल असे यावेळी आयुक्त यांनी सांगितले.
महाराष्ट्र शासनाच्या नगर विकास विभागाने दिनांक 10.06.2025 रोजी निर्गमित केलेल्या आदेशातील निर्देश व सूचनेनुसार नांदेड वाघाळा शहर महानगरपालिकेच्या सार्वत्रिक निवडणुकीसाठी बहूसदस्यीय प्रभाग पध्दती नुसार प्रभाग रचना करावयाची आहे तसेच प्रभाग रचनेसाठी जनगणना कार्यालयाने प्रसिध्द केलेली लोकसंख्येची अलीकडील आकडेवारी म्हणजेच सन 2011 ची लोकसंख्या विचारात घेऊन दिलेल्या मार्गदर्शक सुचनानुसार प्रारुप प्रभाग रचना तयार करणेचे निर्देश दिलेले आहेत. त्याचप्रमाणे याच आदेशात प्रारुप प्रभाग रचना तयार करणेसाठी समितीची स्थापना करण्याचे निर्देश मनपा आयुक्तांना देण्यात आलेले आहेत. त्याअनुषंगाने नगर विकास विभाग व राज्य निवडणूक आयोग यांच्या निर्देशानुसार विहित कालावधीत प्रभाग रचना करण्यासाठी मनपा आयुक्तांनी उपस्थित अधिकारी व कर्मचाऱ्यांना निर्देश देऊन निवडणूक विभागात आढावा या बैठकीत आयुक्तांनी घेतला आहे.
या आढावा बैठकीस अतिरिक्त आयुक्त गिरिष कदम यांच्यासह सहाय्यक संचालक नगररचना पवन अल्लूरकर,मुख्य लेखा व वित्त अधिकारी जनार्दन पक्वाने, उपायुक्त (निवडणूक) सुप्रिया टवलारे, उपआयुक्त नितीन गाढवे, उपआयुक्त स.अजितपालसिंघ संधू, सहाय्यक आयुक्त मनिषा नरसाळे, सिस्टीम मॅनेजर सदाशिव पतंगे व निवडणूक विभागातील कर्मचारी उपस्थित होते.
जनसंपर्क विभाग,
नां.वा.श.म.न.पा.नांदेड
प्रति,
मा.संपादक,
सदरील बातमी आपल्या लोकप्रिय दैनिकात विनामुल्य प्रकाशित करावी, ही विनंती.
