श्रीनगर : पहलगामवर झालेल्या (Pahalgam Terror Attack) भीषण दहशतवादी हल्ल्याचा मास्टरमाइंड शेख सज्जाद गुलचे (Sheikh Sajjad Gul) कर्नाटक आणि केरळ कनेक्शन उघड झाले आहे. सज्जाद अहमद शेख या टोपणनावानेही गुलला ओळखले जाते. सध्या तो रावळपिंडी येथे ‘लष्करे तैयबा’च्या संरक्षणाखाली लपून बसल्याची माहिती समोर आली आहे. त्याचे पाकिस्तानची गुप्तचर संस्था‘आयएसआय’शी (ISI) जुने संबंध असून, तो काश्मीरमधील ‘द रेझिस्टन्स फ्रंट’ (टीआरएफ) या ‘तैयबा’च्या छुप्या गटासाठी काम करतो.
गुलने श्रीनगरमध्ये शिक्षण घेतले असून, बेंगळुरूमधून एमबीए केल्यानंतर केरळमध्ये लॅब टेक्निशियन कोर्स केला. काश्मीरमध्ये परतल्यानंतर त्याने एक डायग्नोस्टिक लॅब सुरू केली होती. या लॅबच्या आडून दहशतवादी कारवायांसाठी लॉजिस्टिक सपोर्ट देण्यात येत होता. काश्मीरमध्ये २०२० ते २०२४दरम्यान झालेल्या लक्षवेधी हत्या, ग्रेनेड हल्ले आणि पोलिसांवरील हल्ल्यांमध्येही त्याचा सहभाग असल्याचे आढळून आले आहे. सन २०२२मध्ये ‘एनआयए’ने त्याला अधिकृतपणे दहशतवादी म्हणून घोषित केले आणि त्याच्या अटकेसाठी १० लाख रुपयांचे बक्षीस जाहीर केले आहे.
गुलचा दहशतवादाशी संबंध सन २००२पासून आला. त्या वेळी दिल्ली पोलिसांनी त्याला निजामुद्दीन रेल्वे स्थानकावर पाच किलो ‘आरडीएक्स’सह अटक केली होती. सन २००३मध्ये त्याला १० वर्षांची शिक्षा झाली. सन २०१७मध्ये सुटल्यानंतर तो पाकिस्तानला गेला आणि २०१९मध्ये ‘टीआरएफ’चा म्होरक्या म्हणून ‘आयएसआय’ने त्याची नेमणूक केली. आता तो रावळपिंडीत असल्याचे स्पष्ट झाले.
गुलचे कुटुंबही दहशतवादी कारवायांमध्ये सक्रिय राहिले आहे. त्याचा भाऊ नव्वदच्या दशकात श्री महाराजा हरिसिंह हॉस्पिटलमध्ये डॉक्टर असताना दहशतवादी कारवायांत सक्रिय झाला. नंतर तो सौदी अरेबियात आणि मग पाकिस्तानमध्ये पळून गेला. सध्या तो फरारी दहशतवाद्यांसोबत आर्थिक पुरवठ्याच्या कारवायांमध्ये गुंतल्याची माहिती आहे.
