स्वा.रा.ती.म. विद्यापीठात महिला दिनानिमित्त “क्रिएटिव्ह एडिटिंग मास्टरी” विषयावर प्रात्यक्षिकासह मार्गदर्शन
नांदेड (प्रतिनिधी) – डिजिटल आणि सोशल मीडियाच्या वाढत्या प्रभावामुळे फोटो, व्हिडिओ व साऊंड एडिटिंग या कौशल्यांना मोठी मागणी निर्माण झाली असून प्रभावी एडिटिंगचे कौशल्य आत्मसात केल्यास करिअरच्या अनेक संधी उपलब्ध होतात, असे प्रतिपादन दै. तरुण भारतचे प्रतिनिधी तथा स्री अध्ययन केंद्राचे माजी विद्यार्थी मिलिंद वाघमारे यांनी केले.
स्वामी रामानंद तीर्थ मराठवाडा विद्यापीठ, नांदेड अंतर्गत स्त्री अध्ययन केंद्र, स्कूल ऑफ सोशल सायन्स आणि जेंडर इक्विटी क्लब यांच्या संयुक्त विद्यमाने आंतरराष्ट्रीय महिला दिनानिमित्त दि. ०५ मार्च (गुरुवारी) रोजी आयोजित “क्रिएटिव्ह एडिटिंग मास्टरी : कंटेंट क्रिएशन ते प्रोफेशनल करिअर” या विषयावरील कार्यक्रमात ते प्रात्यक्षिकासह मार्गदर्शन करत होते. कार्यक्रमाच्या अध्यक्षस्थानी सामाजिक शास्त्रे संकुलाचे संचालक डॉ. प्रमोद लोणारकर होते, तर कार्यक्रमाचे आयोजन स्त्री अध्ययन केंद्राच्या संचालिका डॉ. शालिनी कदम यांनी केले. यावेळी डॉ. नंदकुमार बोधगिरे, डॉ. बाबुराव जाधव आणि डॉ. सुवर्णा मोरे यांची प्रमुख उपस्थिती होती.
विद्यार्थ्यांना मार्गदर्शन करताना वाघमारे यांनी प्राचीन काळातील संवाद साधने, पाॅम्प्लेट व पुस्तकांचा काळ, त्यानंतरचे वृत्तपत्र, रेडिओ, दूरचित्रवाणी, इलेक्ट्रॉनिक मीडिया, वेबसाईट आणि आजच्या सोशल मीडियापर्यंत संवाद माध्यमांचा झालेला प्रवास विद्यार्थ्यांसमोर उलगडून सांगितला. त्यांनी सांगितले की, सध्या साऊंड एडिटिंग, फोटो एडिटिंग आणि व्हिडिओ एडिटिंग या क्षेत्रात मोठ्या प्रमाणावर काम करण्याच्या संधी उपलब्ध आहेत. विविध एडिटिंग सॉफ्टवेअर उपलब्ध असून त्यापैकी अनेक सॉफ्टवेअर मोफतही आहेत. सातत्यपूर्ण सराव आणि कौशल्य विकसित केल्यास या क्षेत्रात स्वतंत्र व्यवसाय किंवा फ्रीलान्सिंगच्या माध्यमातूनही करिअर घडविता येते.
तसेच स्क्रिप्ट रायटिंग, शूटिंग, एडिटिंग आणि अपलोडिंग ही चार टप्प्यांची प्रक्रिया आत्मसात केल्यास सोशल मीडिया कंटेंट निर्मितीपासून ते राजकीय व व्यावसायिक सोशल मीडिया हँडलिंगपर्यंत अनेक संधी उपलब्ध होतात. मार्केटिंग, जाहिरात आणि पब्लिसिटी क्षेत्रातही एडिटिंग कौशल्याचा प्रभावी वापर करता येतो, असेही त्यांनी नमूद केले. यावेळी त्यांनी विविध एडिटिंग सॉफ्टवेअरचे प्रात्यक्षिक करून विद्यार्थ्यांना एडिटिंगची साधने कशी वापरायची याचे प्रत्यक्ष मार्गदर्शन केले.
कार्यक्रमाच्या प्रास्ताविकात डॉ. शालिनी कदम यांनी स्त्री अध्ययन केंद्राच्या माध्यमातून राबविण्यात येणाऱ्या विविध उपक्रमांची माहिती दिली. स्त्री विषयक कार्यशाळा, स्त्री-पुरुष चर्चासत्रे, सामाजिक अभ्यास सहल, व्याख्याने, विद्यार्थ्यांसाठी गटचर्चा अशा विविध उपक्रमांतून स्त्री-पुरुष समानतेचा संदेश देण्याचे कार्य केंद्र करत असल्याचे त्यांनी सांगितले. तसेच मिलिंद वाघमारे हे स्त्री अध्ययन केंद्राचे माजी विद्यार्थी असल्याचा सार्थ अभिमान असल्याचेही त्यांनी नमूद केले.
अध्यक्षीय समारोपात डॉ. प्रमोद लोणारकर यांनी सोशल मीडियाच्या युगात एडिटिंग कौशल्याचे महत्त्व अधोरेखित केले. महिला दिनानिमित्त आयोजित करण्यात आलेले हे प्रात्यक्षिक विद्यार्थ्यांसाठी अत्यंत उपयुक्त ठरणार असून एडिटिंग कौशल्य आत्मसात करणे ही काळाची गरज असल्याचे मत त्यांनी व्यक्त केले.
दरम्यान कार्यक्रमाची सुरुवात मान्यवरांच्या हस्ते स्वामी रामानंद तीर्थ यांच्या प्रतिमेला पुष्पहार अर्पण करून करण्यात आली. या कार्यक्रमास सामाजिक शास्त्रे संकुल, स्त्री अध्ययन केंद्र तसेच विद्यापीठातील विविध संकुलांतील विद्यार्थी मोठ्या संख्येने उपस्थित होते.
