Belize: आकाशात एक विचित्र थरार घडला आहे. बेलीझमध्ये विमान अपहरणाचा प्रयत्न झाला होता. एका अमेरिकन व्यक्तीने चाकूचा धाक दाखवून ट्रॉपिक एअरच्या एका छोट्या विमानाचे अपहरण करण्याचा प्रयत्न केला होता. ही व्यक्ती मात्र यात मृत्यूमुखी पडली आहे. सोबतच या घटनेत तीन जण जखमी झाले आहेत. त्याने प्रवाशांना धाक दाखविल्यावर विमानातील एका प्रवाशाने हल्लेखोरावर गोळीबार केला आणि त्या गोळीबारात हायजॅकरचा मृत्यू झाल्याची माहिती समोर आली आहे. ही संपूर्ण घटना गुरुवारी बेलीझध्ये विमान हवेत असताना घडली.
ट्रॉपिक एअरचे एक छोटे विमान 14 प्रवाशांना घेऊन जात होते. मात्र, यावेळी एका अमेरिकन प्रवाशाने अचानक चाकूचा धाक दाखवत विमान हवेत असताना विमानाचा ताबा घेण्याचा प्रयत्न केला. या प्रकाराने प्रवासी घाबरले. त्याने तीन प्रवाशांवर हल्लाही केला ज्यात ते जखमी झाले. यानंतर विमानातील एका परवानाधारक बंदुक बाळगणाऱ्या प्रवाशाने हल्लेखोरावर गोळी झाडली. यात हल्लेखोर जागीच ठार झाला. या संदर्भातील वृत्त एबीसी न्यूजने दिले आहे.
नक्की यामागे कारण काय होते. असं करण्यामागे या हल्लेखोराचा काय हेतू होता, हेही समोर आले आहे. वृत्तानुसार, विमानाचे अपहरण करण्याचा प्रयत्न करण्यात आल्यानंतर बराच वेळ हे विमान अवकाशात भिरट्या मारत होते. विमानातील इंधन संपत आले होते तरीही नंतर हे विमान बेलीझमध्ये उतरवण्यात आले. समोर आलेल्या माहितीनुसार, कॅलिफोर्नियातील 49 वर्षीय हल्लेखोराला हे विमान देशाबाहेर नेण्याची इच्छा होती त्याने विमानासाठी अधिक इंधनाची मागणी देखील केली होती.
या घटनेबाबत अधिकाऱ्यांनी काही प्रश्न उपस्थित केले आहेत. हा हल्लेखोर विमानात चाकू नेण्यात कसा यशस्वी झाला? यासह अनेक सवाल उपस्थित करण्यात आले आहेत. नक्की विमान सुरक्षा यंत्रणा काय करत होती, हाही प्रश्न येथे उपस्थित होतो आहे. या संपूर्ण घटनेची चौकशी करण्यात येणार असल्याची माहिती सांगितली जात आहे तसेच यासाठी बेलीझच्या अधिकाऱ्यांनी या घटनेच्या तपासात मदतीसाठी अमेरिकन दुतावासाशी संपर्क साधला असल्याचे वृत्तात म्हटले आहे.
