रोजंदारी पद्धतीच्या जीवावर राजकीय पक्षांच्या सभा; महिलांचा मोठा सहभाग

तुषार कांबळे | हदगाव प्रतिनिधी | Satyaprabha News | हदगाव : नगरपालिका निवडणुकीचा ज्वर चढत असताना राजकीय पक्षांकडून मोठमोठ्या सभा घेतल्या जात आहेत. यात रोजंदारीवर आलेल्या महिलांचा तसेच ग्रामीण भागातील कार्यकर्त्यांचा मोठा सहभाग दिसून येत आहे. त्यामुळे उमेदवारांच्या प्रचाराला अक्षरशः ‘शोभेची’ भर पडली आहे. नगरपालिका निवडणुकीतील प्रचार २ डिसेंबरला थंडावणार असून, ३ डिसेंबर रोजी मतमोजणी होणार आहे. त्यानंतर १५ ते २० दिवसांत जिल्हा परिषद व पंचायत समिती निवडणुका घोषित होण्याची शक्यता असल्याचे सुज्ञ नागरिकांचे मत आहे.

नगरपालिका निवडणूक : ग्रामीण भागातील महिलांचा मोठा सहभाग : नगरपालिका निवडणुकीसाठी ग्रामीण भागातील अनेक गावे महिलांना रोजंदारीवर पाठवत आहेत. पक्षाचे स्थानिक नेते आपल्या कार्यकर्त्यांना तालुक्यातून बोलावून घेत, त्यांना वॉर्ड पातळीवरील जबाबदाऱ्या वाटप करत आहेत. जातीय समीकरणे, स्थानिक समाजरचना आणि संभाव्य जिल्हा परिषद/पंचायत समिती निवडणुकांचा विचार करून उमेदवारांची निवड होत असल्याचे स्पष्टपणे जाणवत आहे. विशेष म्हणजे, अनेक वॉर्डांत त्याच समाजातील उमेदवार दिला जावा याकडे प्राधान्य दिले जात आहे.

प्रचाराची रणधुमाळी; डिजिटल स्क्रीनिंगचा धडाका : हदगावमध्ये सध्या प्रचाराचे जोरदार वातावरण असून विविध पक्षांकडून भव्य रॅली, ऑटो क्रुझर, छोट्या हत्तीद्वारे प्रचार युद्ध सुरू आहे.
डिजिटल युगात एलईडी स्क्रीनिंग लावूनही पक्ष आपली ताकद दाखवत आहेत. परंतु एक महत्त्वाची बाब म्हणजे, या कर्णकर्कश आवाजामुळे गरोदर महिला, लहान मुले आणि वृद्ध नागरिकांच्या आरोग्यावर परिणाम होऊ शकतो, याकडे कुणाचेच लक्ष नसल्याची जनतेत नाराजी दिसत आहे.

जिल्हा परिषद आणि पंचायत समिती निवडणुकांसाठी पक्ष सतर्क : नगरपालिका निवडणुकीत कोण निवडून येणार किंवा पराभूत होणार यापेक्षा, आगामी जिल्हा परिषद व पंचायत समिती निवडणुकांसाठी नेते आधीपासूनच रणनीती आखताना दिसत आहेत. ग्रामीण भागातील कार्यकर्त्यांना आता नगरपालिकेत निवडून आलेल्या नेत्यांच्या पाठीशी उभे राहण्याचे आदेश दिले जात आहेत.

उद्धव बाळासाहेब ठाकरे गट, भारतीय जनता पक्ष, राष्ट्रवादी काँग्रेस (दोन्ही गट), भारतीय राष्ट्रीय काँग्रेस तसेच शिंदे सेना — सर्व प्रमुख पक्षांनी आपापल्या कार्यकर्त्यांची फळी नगरपालिका निवडणुकीसाठी झोकून दिली आहे. प्रत्येक पक्ष आपली ‘राजकीय पोळी भाजत’ असला तरी सर्वसाधारण नागरिक मात्र वाढत्या आवाजाने आणि गोंधळामुळे त्रस्त आहेत.