मुंबई दि.२ फेब्रुवारी : राष्ट्रवादी काँग्रेस पक्षाचे राष्ट्रीय अध्यक्ष आणि राज्याचे उपमुख्यमंत्री अजित पवार यांच्या पत्नी सुनेत्रा पवार यांनी नुकतीच राज्याच्या उपमुख्यमंत्रिपदाची शपथ घेतली आहे. मंत्रिपदाची जबाबदारी स्वीकारल्यामुळे त्यांना पुढील काही महिन्यांत राज्याच्या विधिमंडळाचे सदस्य होणे अनिवार्य आहे. त्यामुळे त्या सध्या आपल्याकडे असलेल्या राज्यसभा सदस्यत्वाचा लवकरच राजीनामा देण्याची शक्यता वर्तवली जात आहे. सुनेत्रा पवार यांनी राजीनामा दिल्यास राज्यसभेची एक जागा रिक्त होईल आणि त्या जागेवर कोणाला संधी मिळणार, याकडे संपूर्ण राज्याचे लक्ष लागून राहिले आहे.
सुरुवातीच्या काळात या रिक्त होणाऱ्या जागेसाठी अजित पवार यांचे थोरले सुपुत्र पार्थ पवार यांचे नाव आघाडीवर होते. राजकीय वर्तुळात त्यांच्या नावाची जोरदार चर्चाही सुरू झाली होती. मात्र, आता समोर आलेल्या नवीन माहितीनुसार, या शर्यतीत एक वेगळेच नाव अचानक पुढे आले आहे. पार्थ पवार यांच्या नावाला सत्ताधारी महायुतीमधील प्रमुख घटक पक्ष असलेल्या भाजपकडून विरोध होण्याची शक्यता वर्तवली जात आहे. पुण्यातील एका कथित जमीन व्यवहार प्रकरणाच्या चौकशीमुळे पार्थ पवार यांच्या उमेदवारीला भाजपकडून आक्षेप घेतला जाऊ शकतो, असे राजकीय जाणकारांचे मत आहे.
त्यामुळेच, कोणताही संभाव्य वाद टाळण्यासाठी आणि मित्रपक्षांची सहमती कायम राखण्यासाठी राष्ट्रवादी काँग्रेस पक्ष एका वेगळ्या पर्यायाचा विचार करत असल्याचे समजते. मिळालेल्या माहितीनुसार, पार्थ पवार यांच्याऐवजी अजित पवार यांचे धाकटे सुपुत्र जय पवार यांचे नाव या जागेसाठी निश्चित केले जाण्याची दाट शक्यता आहे. जय पवार यांच्या नावाला भाजपकडून विरोध होण्याचे कोणतेही कारण नाही, त्यामुळे त्यांची उमेदवारी सर्वसंमतीने मान्य होऊ शकते. सुनेत्रा पवार यांनी राज्यसभेचा राजीनामा दिल्यानंतर रिक्त होणाऱ्या या जागेवर पार्थ पवार यांना बाजूला सारून जय पवार यांना संधी दिली जाऊ शकते, अशी चर्चा सध्या राजकीय गोटात रंगली आहे. पक्षाने अद्याप याबाबत अधिकृत घोषणा केली नसली तरी, जय पवार यांचे नाव अचानक चर्चेत आल्याने अनेकांच्या भुवया उंचावल्या आहेत.
