बोरगडी तीर्थक्षेत्राला ‘गट ब’ दर्जा लवकरच मिळवून देणार : आमदार बाबुराव कदम कोहळीकर

हिमायतनगर प्रतिनिधी | SatyaprabhaNews | तालुक्यातील मौजे बोरगडी येथे श्री पवनसूत हनुमान जन्मोत्सव व अखंड हरिनाम सप्ताह सोहळा अत्यंत भक्तिभावपूर्ण आणि उत्साहात संपन्न झाला. या सोहळ्यासाठी हजारो भाविकांनी मोठ्या श्रद्धेने हजेरी लावून दर्शनाचा लाभ घेतला. संपूर्ण परिसर ‘जय हनुमान’च्या गजराने आणि हरिनामाच्या अखंड ध्वनीने दुमदुमून गेला होता.

या प्रसंगी उपस्थितांना संबोधित करताना हदगांव हिमायतनगर विधानसभेचे आमदार बाबुराव कदम कोहळीकर (Baburao Kohlikar) यांनी बोरगडीला तीर्थक्षेत्र ‘गट ब’ दर्जा मिळवून देण्यासाठी शासन दरबारी ठोस प्रयत्न करणार असल्याचे स्पष्ट करत, हा दर्जा मिळवून देण्याचा निर्धार व्यक्त केला. “येथील पवनसूत हनुमान मंदिर हे नवसाला पावणारे जागृत देवस्थान असून, अनेक दशकांपासून हजारो भाविक येथे मोठ्या श्रद्धेने येतात. आपल्या मनोकामना पूर्ण झाल्यानंतर भाविक येथे हनुमान जयंतीच्या दिवशी आपला नवस फेडतात. अशा या पवित्र आणि श्रद्धास्थान असलेल्या मंदिराचा दर्जा वाढवणे हे पावित्र कार्य मी करणार आहे,” असे त्यांनी ठामपणे सांगितले.

यावेळी त्यांनी बोरगडी या तीर्थक्षेत्राच्या नावाची हिमायतनगर शहरातील शासकीय विश्रामगृहाच्या बाजूने जाणाऱ्या बोरगडी रोड वर श्री हनुमान बोरगडी देवस्थान अशी भव्य कमान उभारण्याचाही मानस व्यक्त केला. या उपक्रमामुळे बोरगडीचे धार्मिक महत्त्व राष्ट्रीय महामार्गाने जाणाऱ्या नागरिकांमध्ये अधिक अधोरेखित होईल, असा विश्वास त्यांनी व्यक्त केला. व बोरगडी गावाला संतपरंपरेचा समृद्ध वारसा लाभलेला आहे. वै.बाबा महाराज सातारकर यांचे असंख्य शिष्य या परिसरात असून, ह.भ.प. माधव महाराज बोरगडीकर हे प्रसिद्ध कीर्तनकार या भागातुन ओळखले जातात. ह भ प माधव महाराज बोरगडीकर त्यांच्या कीर्तनातून तालुक्यात सह जिल्ह्यात समाजप्रबोधनाची परंपरा सातत्याने जोपासली जात आहे.याशिवाय बोरगडी येथील विवाह सोहळ्याची परंपरा व वेळेवर विवाह मुहूर्त लावण्याची आख्यायिका जिल्ह्यात नाहीतर महाराष्ट्रात नावलौकिक आहे जिल्ह्यात शिस्त व परंपरेची जोपासना करणारे गाव म्हणून व तसेच गावातील असंख्य नवतरुणांमध्ये कुस्ती या राष्ट्रीय खेळाची विशेष आवड असून, येथे महिला मल्लांचाही सहभाग लक्षणीय आहे.

दररोज पहाटेपासून आखाड्यात शेकडो तरुण मल्ल सराव करताना दिसतात. क्रीडा क्षेत्रातही बोरगडी आपली वेगळी ओळख निर्माण करत आहे.दरवर्षी आयोजित होणारा हरीनाम सप्ताह हा या गावाचा प्रमुख आध्यात्मिक सोहळा असून, त्याला महाराष्ट्रासह आंध्रप्रदेश व तेलंगणा राज्यातूनही मोठ्या संख्येने भाविक उपस्थित राहतात. त्यामुळे बोरगडीला धार्मिक, सामाजिक, शैक्षणिक आणि क्रीडा क्षेत्रात तालुक्यात अग्रस्थान मिळाले आहे.एकंदरीत, नवसाला पावणारे पवित्र हनुमान मंदिर, संतपरंपरेचा वारसा, क्रीडाप्रेमी तरुणाई आणि भक्तिभावाने नटलेले वातावरण यामुळे बोरगडी गावाची ओळख दिवसेंदिवस अधिक बळकट होत असून, तीर्थक्षेत्र ‘गट ब’ दर्जा मिळाल्यास या गावाच्या विकासाला नवे आयाम मिळतील, अशी अपेक्षा आमदार बाबुराव कदम कोहळीकर यांनी व्यक्त केली आहे.

यावेळी शिवसेनेचे उपजिल्हाप्रमुख राजू पाटील, विजय वळसे,तालुकाप्रमुख रामभाऊ ठाकरे,नगरसेवक सुभाष बल्पेलवार,संतोष मुद्देवाड,नाथा पाटील,उ.बाटा गटाच्या शिवसेनेचे तालुकाप्रमुख संजय काईतवाड, साईनाथ कट्टावार,शाम येणेकर पै.निलेश शेनेवाड, माधव काईतवाड, शाम जक्कलवाड, शंकर पळशीकर, यांच्यासह असंख्य वारकरी ग्रामस्थ,पत्रकार व ज्येष्ठ नागरिक महिला व भजनी मंडळी या सोहळ्यास मोठ्या संख्येने उपस्थित होते.