“मूकनायक नॅशनल ॲवॉर्ड” संतोष आंबेकर यांना प्रदान

नांदेड: हिमायतनगर तालुक्यातील मंगरूळ गावचे भूमिपुत्र, सामाजिक व राजकीय क्षेत्रात आपली वेगळी छाप असलेले नेतृत्व व गरीब, कष्टकरी, शेतकरी,कामगार व अपंग बांधवांच्या न्याय हक्कांसाठी व त्यांच्या कल्याणकारी योजना त्यांच्या पर्यंत पोहचवण्यासाठी नेहमीच प्रयत्नरत असणारे लोकप्रतिनिधी म्हणून ज्यांची पंचक्रोशीत ओळख आहे. असे सेवाभावी वृत्तीने समाजात काम करणारे युवा नेते व सामाजिक कार्यकर्ते जिल्हा कॉंग्रेस कमिटी (अ.जा.) चे जिल्हा उपाध्यक्ष संतोष आंबेकर यांना नंदगीरीचा कानोसा व वीर शिरोमणी या वृत्तपत्रांच्या वतीने देण्यात येणारा या वर्षीचा “मूकनायक नॅशनल ॲवॉर्ड-२०२६” हा पुरस्कार दि. १८/०५/२०२६ रोजी यशवंतराव चव्हाण सभागृह जिल्हा परिषद नांदेड येथे मान्यवरांच्या हस्ते प्रदान करण्यात आला आहे. त्याबद्दल सामाजिक व राजकीय वर्तुळातून त्यांच्यावर शुभेच्छांचा वर्षाव होत आहे.

उपेक्षित घटकांना सामाजिक न्याय मिळवून देण्याच्या माझ्या लढ्याला अधिक बळ देणारा हा क्षण आहे असे उद्गार पुरस्कार स्विकारतांना संतोष आंबेकर यांनी काढले. या पुरस्कार वितरण सोहळ्या च्या अध्यक्षस्थानी शिवसेना नेते आदरणीय हेमंतभाऊ पाटील, विधानपरिषद सदस्य, महाराष्ट्र राज्य हे होते. तर कार्यक्रमाचे उद्घाटन साध्वी धर्मसिंहनी गायत्री दिदी यांच्या हस्ते करण्यात आले. कार्यक्रमाचे स्वागताध्यक्ष गंगाधर वडणे यांनी मान्यवरांचे स्वागत केले. प्रमुख पाहुणे सुभाष बिंदवाल, किशोर पाटील, धूमशेठवाड, शिवा कांबळे, पंढरीनाथ बोकारे, श्याम कावळे, मीनाक्षी शिंदे तसेच सैनिकी शाळा सगरोळीचे संचालक देशमुख यांची प्रमुख उपस्थिती लाभली.

विविध क्षेत्रातील मान्यवर, पत्रकार, सामाजिक कार्यकर्ते, साहित्यिक, राजकीय पदाधिकारी तसेच नागरिकांनी मोठ्या संख्येने उपस्थित राहून कार्यक्रमाची शोभा वाढवली. या पुरस्कार वितरण सोहळ्याचे आयोजन व नियोजन संपादक शंकरसिंह ठाकूर व मारोती शिकारे यांनी केले होते. विविध क्षेत्रातील पुरस्कार विजेत्यांनी यावेळी आयोजकांचे आभार मानले.