नवी दिल्ली दि.६ फेब्रुवारी: सध्या लोकसभेच्या कामकाजात मोठा व्यत्यय येत असून, सभागृह बंद पाडण्यात स्वतः सत्ताधारी पक्षच पुढाकार घेत असल्याचे चित्र निर्माण झाले आहे. संसदेत विरोधी पक्षाच्या खासदारांना त्यांचे मुद्दे मांडण्याची संधी दिली जात नाही, त्यांचे माईक वारंवार बंद केले जातात. सभागृहात सत्ताधारी पक्षासाठी एक नियम आणि विरोधकांसाठी वेगळा नियम, असा भेदभाव सध्या उघडपणे दिसून येत आहे. जेव्हा विरोधी पक्षनेते राहुल गांधी आपली बाजू मांडण्याचा प्रयत्न करत होते, तेव्हा लोकसभा अध्यक्ष ओम बिर्ला यांनी त्यांना वारंवार अडवले आणि त्यांचा माईक बंद केला. याउलट, भाजपचे खासदार निशिकांत दुबे यांनी जेव्हा भाषण केले, तेव्हा त्यांना कोणीही रोखले नाही. दुबे यांनी सभागृहातील शिष्टाचाराच्या सर्व सीमा ओलांडल्या तरीही अध्यक्षांनी त्यांना थांबवण्याची तसदी घेतली नाही. लोकसभा अध्यक्षांची ही वागणूक पक्षपातीपणाची असून हा प्रकार लोकशाहीची हत्या करणारा आहे, असा गंभीर आरोप काँग्रेसच्या खासदार वर्षा गायकवाड यांनी केला आहे.
संसदेतील या गोंधळावर आणि कामकाजाच्या पद्धतीवर प्रतिक्रिया देताना वर्षा गायकवाड यांनी संताप व्यक्त केला. त्या म्हणाल्या की, भाजपचे खासदार निशिकांत दुबे यांनी देशाचे पहिले पंतप्रधान पंडित जवाहरलाल नेहरू आणि माजी पंतप्रधान इंदिरा गांधी यांच्याबद्दल अत्यंत आक्षेपार्ह आणि खालच्या पातळीची भाषा वापरली. मात्र, इतके घडूनही लोकसभा अध्यक्षांनी त्यांच्यावर कोणतीही कारवाई केली नाही. जेव्हा मी आणि माझ्या सहकारी महिला खासदारांनी दुबे यांना जाब विचारण्याचा प्रयत्न केला, तेव्हा त्यांनी प्रश्नांना सामोरे जाण्याऐवजी तिथून पळ काढला. संसदेची प्रतिष्ठा आणि महिलांचा सन्मान या बाबी अत्यंत महत्त्वाच्या असून, त्यासाठीचे नियम सर्वांना सारखेच लागू असायला हवेत. त्यामुळे पंडित नेहरू आणि इंदिरा गांधी यांच्याबद्दल अपशब्द वापरणाऱ्या निशिकांत दुबे यांना त्वरित निलंबित करण्यात यावे, अशी मागणी वर्षा गायकवाड यांनी लावून धरली आहे.
सभागृहात सत्ताधारी आणि विरोधी पक्ष दोघांचेही स्थान समान आणि महत्त्वाचे असते. परंतु, गेल्या काही दिवसांपासून संसदेत वेगळाच प्रकार सुरू आहे. महत्त्वाच्या आणि ज्वलंत मुद्द्यांवर चर्चा करण्याऐवजी सरकार पळ काढत आहे. अदाणी प्रकरण, संभळमधील घटना, मणिपूरचा हिंसाचार आणि इतर महत्त्वाच्या विषयांवर विरोधकांना चर्चा हवी आहे, पण सरकार त्यासाठी तयार नाही. उलट, जाणीवपूर्वक गोंधळ घालून कामकाज बंद पाडले जात आहे, जेणेकरून जनतेच्या प्रश्नांवर चर्चाच होऊ नये. आम्ही लोकांच्या समस्या मांडण्यासाठी सभागृहात येतो, पण आमचा आवाज दाबला जात आहे, असेही गायकवाड यांनी स्पष्ट केले.
‘मंगलाष्टका रिटर्न्स’मधून २३ मे रोजी उलगडणार सुलट प्रेमाची उलट गोष्ट!
