तुषार कांबळे / हदगाव प्रतिनिधी
हदगाव तालुक्यातील येथे महात्मा फुले शिक्षण संस्था संचलित सावित्रीबाई फुले विद्यालय कवाना येथे कालवश एस.एम प्रधान यांचा स्मृतिदिन विद्यालयात साजरा करण्यात आला. यावेळी कालवश एस एम प्रधान संस्थापकीय अध्यक्ष यांच्या प्रतिमेला पुष्पहार अर्पण करून विद्यालयाचे मुख्याध्यापक श्री.कांबळे डी. आर. यांनी कार्यक्रमाला सुरुवात करून त्यांच्या कार्याविषयी माहिती सांगितली. महात्मा फुले शिक्षण संस्थेची मुहूर्तमेढ एस. एम. प्रधान यांनी त्यांच्या सहकाऱ्यांना सोबत घेऊन कवाना या गावी 1984 या वर्षी रोवली. डॉक्टर बाबासाहेब आंबेडकर यांच्या विचाराने प्रेरित झालेल्या एस.एम.प्रधान साहेबांनी खेड्यातील व तळागाळातील लोकांना जीवनात प्रगती करायची असेल तर शिक्षण घेतल्याशिवाय त्याची प्रगती होऊ शकणार नाही हे ओळखून कवाना या त्यांच्या मूळ गावी माध्यमिक शिक्षण उपलब्ध झालं पाहिजे. या माध्यमातून गावातील व आजूबाजूच्या खेड्यापाड्यातील वाडी तांड्यातील शेतकरी व शेतमजुरांच्या मुलांना शिक्षण मिळवून देण्यासाठी महात्मा फुले शिक्षण संस्था निर्माण केली. या संस्थेद्वारे त्यांनी सावित्रीबाई फुले माध्यमिक विद्यालय कवाना हे विद्यालय 1986 पासून गावात चालू केले. सुरुवातीच्या काळात शाळा चालविण्यासाठी अनेक अडचणी आल्या,समस्या उद्भवल्या. परंतु त्या प्रत्येक समस्येवर मात करून त्यांनी माध्यमिक शिक्षण व्यवस्थितरित्या आपल्या शाळेत चालू ठेवले. म्हणून आज पर्यंत या शाळेतून हजारो विद्यार्थ्यांनी शिक्षण घेऊन शासनाच्या विविध विभागात आपली सेवा देत आहेत. त्याचबरोबर साहेबांनी गावातील व आजूबाजूच्या खेड्यापाड्यातील बऱ्याच लोकांना उच्च शिक्षण घेण्यासाठी नांदेड औरंगाबाद मुंबई अशा महानगरामध्ये पाठवून त्यांच्या शैक्षणिक अडचणी दूर केलेल्या आहेत. आजही अनेक लोक शाळेमध्ये येऊन साहेबांनी त्यांना कशाप्रकारे अडचणीत मदत केली, याचे किस्से सांगतात. हा कार्यक्रम यशस्वी होण्यासाठी सहशिक्षक श्री. इंगळे सर व प्रजापती जी. एल. यांनी नियोजन केले. शेवटी समारोपाकडे जाता जाता पुनश्च साहेबांना आदरांजली वाहत कार्यक्रम संपन्न झाला यावेळी शाळेतील विद्यार्थी व विद्यार्थिनी उपस्थित होत्या.
