“सुनेत्रा वहिनी रडल्या, अजितदादाही गप्प होते…”; प्रफुल पटेल यांनी उलगडला उमेदवारी जाहीर होण्यापूर्वीचा ‘तो’ अत्यंत भावूक प्रसंग!

बारामती | दि.३ फेब्रुवारी | बारामती लोकसभा मतदारसंघाची निवडणूक ही महाराष्ट्राच्या राजकारणात अत्यंत प्रतिष्ठेची आणि चर्चेची ठरली होती. या निवडणुकीत नणंद विरुद्ध भावजय असा सामना रंगल्याचे साऱ्या देशाला पाहायला मिळाले. मात्र, सुनेत्रा पवार (Sunetra Pawar)यांना उमेदवारी देण्याचा निर्णय घेणे सोपे नव्हते, यावर आता राष्ट्रवादी काँग्रेसचे (अजित पवार गट) ज्येष्ठ नेते प्रफुल पटेल (Praful Patel)यांनी अतिशय महत्त्वाचा आणि भावनात्मक खुलासा केला आहे. प्रफुल पटेल यांनी या निर्णयावेळचा, म्हणजेच अजित पवार (Ajit Pawar) आणि सुनेत्रा पवार यांच्यासोबत झालेल्या संवादाचा एक प्रसंग जाहीरपणे सांगितला आहे.

प्रफुल पटेल यांनी दिलेल्या माहितीनुसार, लोकसभा निवडणुकीच्या उमेदवारीचा निर्णय घेण्यासाठी ते स्वतः अजित पवार यांच्या शासकीय निवासस्थानी, म्हणजेच ‘देवगिरी’ बंगल्यावर गेले होते. त्यावेळी तिथे अजित पवार आणि त्यांच्या पत्नी सुनेत्रा पवार उपस्थित होत्या. बारामतीमधून सुनेत्रा पवार (Sunetra Pawar)यांनी निवडणूक लढवावी, असा प्रस्ताव पक्षाच्या वतीने ठेवण्यात आला होता. मात्र, हा प्रस्ताव ऐकताच सुनेत्रा पवार अत्यंत भावूक झाल्या होत्या. त्या वेळी सुनेत्रा पवार यांच्या डोळ्यातून अश्रू वाहू लागले आणि त्यांनी निवडणूक लढवण्यास स्पष्ट शब्दांत नकार दिला.

पटेल यांनी पुढे सांगितले की, तो क्षण अतिशय कठीण होता. सुनेत्रा वहिनी रडत होत्या आणि बाजूलाच बसलेले अजित पवार देखील पूर्णपणे शांत आणि गप्प होते. कुटुंबातील व्यक्तीविरुद्ध निवडणूक लढवणे दोघांनाही मानसिकदृष्ट्या त्रासदायक वाटत होते. मात्र, अशा वेळी प्रफुल पटेल यांनी त्यांना राजकीय वास्तवाची जाणीव करून दिली. पटेल यांनी अजितदादा आणि सुनेत्रा वहिनींना समजावून सांगितले की, “सध्या आपण एका वेगळ्या राजकीय वळणावर आहोत. निवडणूक आयोगाने आपल्याला पक्ष आणि चिन्ह दिले आहे. जर आपण बारामतीसारख्या बालेकिल्ल्यात आपला उमेदवार दिला नाही, तर त्याचे चुकीचे संकेत जातील आणि पक्षाचे मोठे नुकसान होऊ शकते. त्यामुळे केवळ पक्षाच्या अस्तित्वासाठी आणि चिन्हासाठी आपल्याला हा कठोर निर्णय घ्यावाच लागेल.” प्रफुल पटेल यांच्या या आग्रहानंतर आणि राजकीय अपरिहार्यतेमुळे अखेर सुनेत्रा पवार आणि अजित पवार यांनी मनावर दगड ठेवून या उमेदवारीला होकार दिला होता. हा संपूर्ण प्रसंग सांगताना प्रफुल पटेल यांनी त्या रात्रीचे ते भावूक वातावरण शब्दबद्ध केले आहे.