मुदखेड दि.१२: दिंडोरीप्रणित अखिल भारतीय श्री स्वामी समर्थ सेवा मार्गाचे प्रमुख परमपूज्य गुरुमाऊली अण्णासाहेब मोरे यांच्या आशीर्वादाने व मार्गदर्शनानेदिनांक १६ व १७ जून २०२४ रोजी श्री क्षेत्र बासर येथे सरस्वती माता सामूहिक पूजन व विद्यारंभ सोहळ्याच्या आयोजन करण्यात आलेले आहे.
आपल्या भारतीय संस्कृतीमध्ये विद्येची व बुद्धीची देवता म्हणून श्री सरस्वती मातेस प्रथम स्थान दिले आहे. या सामूहिक सरस्वती पूजन सोहळ्यातून मुलांमध्ये भक्ती व मूल्यसंस्काराची शिकवण रुजवण्याचा विधायक हेतू या उपक्रमातून साध्य करण्यात येणार आहे. या उपक्रमात शालेय मुले, युवा-युवती आणि पालक एकत्रितपणे सामुहिक पद्धतीने सरस्वती मातेचे पूजन करणार आहेत.
दिंडोरीप्रणित श्री स्वामी समर्थ सेवामार्गाच्यावतीने नेहमीच समाज उपयोगी अशा १८ विभागांच्या माध्यमातून विविध ज्ञान विनामूल्य जनसामान्य लोकांपर्यंत पोहोचवण्यात येते. या सेवा कार्यातील बालसंस्कार विभागाच्यावतीने विविध उपक्रमातून व्यसनमुक्ती,अंधश्रद्धा,पर्यावरण जनजागृती,गडकिल्ले संवर्धन अशा अनेक विषयांवर सामाजिक प्रबोधन करण्यात येते.
श्री क्षेत्र बासर येथे १६ व १७ जून २०२४ रोजी सकाळी ७:०० ते सायंकाळी ५:०० या वेळेत सरस्वती माता सामूहिक पूजन व विद्यारंभ सोहळा आयोजित करण्यात आलेला आहे.
दि१६ जून तारखेला मराठवाडा विभागातील सर्व जिल्ह्यांची उपस्थिती बासर या ठिकाणी लाभणार असून इतर जिल्ह्यांनी दिनांक १७ तारखेला सरस्वती पूजन व विद्यारंभ सोहळ्यासाठी उपस्थित राहायचे आहे.
या सोहळ्यासाठी परमपूज्य गुरुमाऊली अण्णासाहेब मोरे व गुरुपुत्र आदरणीय श्री नितीन भाऊ मोरे यांची विशेष उपस्थिती राहणार असून या सोहळ्यासाठी मोठ्या संख्येने पालक आणि मुलांनी उपस्थित राहावे असे आवाहन अखिल भारतीय श्री स्वामी समर्थ सेवा केंद्र व बालसंस्कार यांच्या वतीने करण्यात आले आहे.
