नांदेड दि.७ :- राष्ट्रीय क्षयरोग दुरीकरण कार्यक्रमांतर्गत महानगरपालिकेच्या वतीने शहरात दिनांक ७ डिसेंबर पासून १०० दिवसीय क्षयरोग शोध मोहीम राबविण्यात येत आहे. या मोहिमेचा उदघाटन शुभारंभ दि.७ डिसेंबर २०२४ रोजी हैदरबाग दवाखाना येथे करण्यात आला. सदरील मोहीम दिनांक ७ डिसेंबर २०२४ रोजी सुरू होणार असून २४ मार्च जागतिक क्षयरोग दिन २०२५ रोजी संपणार आहे. या मोहीमेच्या प्रभावी अंमलबजावणीसाठी या १०० दिवसीय क्षयरोग मोहिमेमध्ये सर्वांनी सक्रीय सहभाग घ्यावा. तसेच सन २०२५ पर्यंत शहर क्षयमुक्त होईल यासाठी प्रयत्न करावेत, असे आवाहन अतिरिक्त आयुक्त श्री गिरीश कदम यांनी महापालिकेच्या वतीने केले आहे .
मोहिमेच्या उदघाटन प्रसंगी उपआयुक्त श्री स.अजितपालसिंघ संधु, वैदयकिय आरोग्य अधीकारी डॉ.सुरेशसिंह बिसेन, शहर क्षयरोग अधिकारी डॉ.मो.बदीयोदीन, डॉ.काजीम, इतर वैदयकीय अधिकारी कर्मचारी व क्षयरोग विभागाचा कर्मचारी वर्ग उपस्थित होता.
या मोहीमेचा उद्देश हा जास्तीत जास्त क्षयरुग्ण शोधून त्यांना उपचारावर आणणे, क्षय रुग्णांचा मृत्यूदर कमी करणे, नवीन क्षय रुग्णांचे प्रमाण कमी करणे, वंचित व अतिजोखमीच्या घटकापर्यंत पोहोचून आरोग्य सेवा पुरवणे, क्षयरोगाविषयी जनजागृती करणे, समाजामधील क्षयरोगाविषयी जनजागृती करणे व सामाजिक कलंक कमी करण्यासाठी उपक्रम राबविणे, जिल्हयातील संमती दिलेल्या क्षयरुग्णांची पंतप्रधान क्षय मुक्त भारत अभियानांतर्गत निक्षयमित्र यांचेकडुन पोषण आहार कीटचे वाटप करणे असा आहे.
या १०० दिवसीय क्षयरोग शोध मोहीमेमध्ये जोखीमग्रस्त भाग निवडून त्यांचे सर्वेक्षण करण्यात येणार आहे. नि-क्षय शिबीर, अनाथाश्रम, वृद्धाश्रम, उद्योग संस्था, निवासी शाळा, कारागृह येथे क्षयरोग तपासणी शिबिर व स्थलांतरीत ऊस तोडणी कामगार, उच्च जोखीमग्रस्त भाग व वंचित घटकांचे सर्वेक्षण करण्यात येणार आहे. यासाठी नियोजन करण्यात आले आहे.सदरील मोहीम राबविण्यासाठी लोकप्रतिनिधी , सामाजिक संस्था, सामाजिक कार्यकर्ते व इतर विभागांचा सहभाग घेण्यात येणार असुन मोठ्या प्रमाणात जनजागृती करण्यात येणार आहे. सदर मोहीम Intensified case finding ( ICF) प्रकारची मोहीम असल्यामुळे केवळ अति जोखमेच्या व्यक्तीमध्येच राबविण्यात येणार आहे.
मोहीमेचा उद्देश
अति जोखमीच्या गटातील व्यक्तीमध्ये व्यापक प्रमाणात जनजागृती राबवून क्षयरोग रुग्ण शोधणे, क्षय रुग्णांमध्ये मृत्यूचे प्रमाण कमी करणे, टीपीटीचा प्रभावी वापर करून नवीन क्षय रुग्णाचे प्रमाण कमी करणे. जास्तीत जास्त क्षयरुग्ण शोधून त्यांना उपचारावर आणणे. नवीन क्षयरुग्णांचे प्रमाण कमी करणे. वंचित व अति जोखमीच्या घटकापर्यंत पोहोचून आरोग्य सेवा पुरवणे. समाजामधील क्षयरोग विषयी जनजागृती करणे व सामाजिक कलंक कमी करण्यासाठी उपक्रम राबविणे. जिल्ह्यातील संमती दिलेल्या क्षयरुग्णांची पंतप्रधान क्षय मुक्त भारत अभियानांतर्गत निक्षयमित्र यांचेकडुन पोषण आहार कीटचे वाटप करण्यात आले.
अति जोखमीचे गट पुढीलप्रमाणे
साठ वर्षावरील व्यक्ती, मधुमेह असणाऱ्या व्यक्ती, धूम्रपान करणाऱ्या व्यक्ती, यापूर्वी क्षयरोगाचा उपचार घेतलेल्या व्यक्ती, क्षय रुग्णांच्या संपर्कातील घरातल्या व्यक्ती, एच.आय.व्ही. बाधित व्यक्ती, तुरुंगातील कैदी, निवासी शाळा, औद्योगिक वसाहती/ कारखाने, वृद्धाश्रम, बी एम आय 18 पेक्षा कमी असणाऱ्या व्यक्ती, झोपडपट्टी, अनाथ आश्रम, औद्यगिक वसाहत मधील कामगार इत्यादी. या मोहिमेमध्ये शोधलेल्या प्रत्येक क्षयरुग्णांना त्वरित उपचार चालू करावा व पल्मोनरी क्षय रुग्णांच्या संपर्कातील पात्र व्यक्तींची सी.वाय.टीबी (CY -TB) तपासणी करून त्यात पॉझिटिव्ह येणाऱ्या व्यक्तींना टीपीटी चालू करण्यात येईल. त्या प्रमाणे पॉझिटिव्ह रुग्णाच्या संपर्कातील व्यक्तींना हैदरबाग दवाखाना येथे सी.वाय.टीबी (CY -TB) तपासणी करण्यात आली.
शहरात ही मोहीम यशस्वी करण्यासाठी मनपा आयुक्त तथा प्रशासक डॉ.महेशकुमार डोईफोडे यांच्या मार्गदर्शनाखाली वैदयकीय आरोग्य अधिकारी डॉ.सुरेशसिंह बिसेन,शहर क्षयरोग अधिकारी डॉ.मो.बदीयोदीन व संपूर्ण आरोग्य विभाग कार्यान्वित असणार आहे.तरी नागरिकांनी या मोहिमेस प्रतिसाद देऊन मोहीम यशस्वी करावी,असे आवाहन महापालिका प्रशासना मार्फत करण्यात येत आहे.
#सत्यप्रभा न्युज #नांदेड
