मुंबई दि.१ फेब्रुवारी: महाराष्ट्राचे मुख्यमंत्री देवेंद्र फडणवीस यांनी राष्ट्रवादी काँग्रेस (NCP) पक्षाच्या विलीनीकरणाबाबत सुरू असलेल्या विविध राजकीय चर्चांवर आपली स्पष्ट आणि रोकठोक भूमिका मांडली आहे. राष्ट्रवादी काँग्रेस हा एक स्वतंत्र राजकीय पक्ष असून त्यांच्या अंतर्गत धोरणांमध्ये किंवा निर्णयांमध्ये आपण कोणताही हस्तक्षेप करणार नसल्याचे फडणवीस यांनी स्पष्ट केले आहे. पक्षांतर्गत कोणाला कोणते पद द्यायचे किंवा कोणाला उमेदवारी द्यायची, हे सर्वस्वी त्या पक्षाचे अधिकार असून, महायुतीचा घटक म्हणून राष्ट्रवादी काँग्रेस जो काही निर्णय घेईल, त्याच्या पाठीशी आम्ही खंबीरपणे उभे राहू, अशी ग्वाही त्यांनी दिली.
मात्र, सध्याच्या राजकीय परिस्थितीवर भाष्य करताना देवेंद्र फडणवीस यांनी विरोधकांना आणि चर्चा करणाऱ्यांना अत्यंत कडक शब्दात समज दिली आहे. ते म्हणाले की, “सध्याची परिस्थिती पाहता आम्हाला कोणत्याही प्रकारचे राजकारण करायचे नाही. परंतु, जर वेळ आली तर मी देखील अनेक गोष्टींचा उलगडा करू शकतो. पडद्यामागे नेमके काय घडले आहे आणि सध्या काय घडत आहे, यावर माझे बारीक लक्ष आहे आणि मला सर्व काही स्पष्ट दिसत आहे.” हे विधान अजित पवार यांच्या निधनानंतर पक्षात निर्माण झालेली नेतृत्वाची पोकळी आणि विलीनीकरणाच्या चर्चांच्या पार्श्वभूमीवर आले असल्याने राजकीय वर्तुळात मोठी खळबळ उडाली आहे.
विलीनीकरणाच्या मुद्द्यावर अधिक स्पष्टीकरण देताना फडणवीस म्हणाले की, अजित पवार यांनी जर पक्षाच्या एकत्रीकरणाचा किंवा विलीनीकरणाचा विचार केला असता, तर त्यांनी भारतीय जनता पक्षाशी चर्चा केल्याशिवाय असे कोणतेही पाऊल उचलले नसते. त्यामुळे जर अशी काही चर्चा झाली असती, तर ती आमच्या कानावर नक्कीच आली असती. राष्ट्रवादी काँग्रेसने विलीनीकरण करायचे की नाही, हा १०० टक्के त्या पक्षाचा अंतर्गत निर्णय आहे आणि तो अधिकार सर्वस्वी त्यांचाच आहे, असेही फडणवीस यांनी अधोरेखित केले.
