Delhi Blast : लाल किल्ला मेट्रो स्टेशन स्फोटानंतर राजधानी हादरली

नवी दिल्ली : दिल्लीतील लाल किल्ला मेट्रो स्टेशनजवळ मोठा स्फोट झाला असून त्यामुळे दिल्ली हादरल्याचं दिसून आलं.(Delhi Blast) त्यामध्ये आतापर्यंत अकरा जणांचा मृत्यू झाल्याची माहिती असून मृतांचा आकडा वाढण्याची शक्यता आहे. दिल्लीतील या स्फोटानंतर संपूर्ण दिल्लीमध्ये हाय अलर्ट जारी करण्यात आला आहे. तसेच मुंबईसह देशातील प्रमुख शहरांमध्येही हाय अलर्ट जारी करण्यात आला आहे.

दिल्लीतील लाल किल्ला मेट्रो स्टेशनच्या गेट नंबर एक जवळ पार्किंगमध्ये उभ्या असलेल्या एका कारमध्ये हा स्फोट झाला. सुरुवातीला हा सिलेंडरचा स्फोट असल्याचं काही जणांना वाटलं. पण त्यानंतर हा स्फोट गंभीर असल्याचं समोर आलं.

High Alert In Mumbai : मुंबईमध्ये हाय अलर्ट जारी
दिल्लीतील स्फोटानंतर मुंबईत हाय अलर्ट जारी करण्यात आला आहे. सर्व पोलिस ठाण्यांना सूचना देण्यात आल्या असून नाकाबंदी करण्यात आली आहे. संशयित व्यक्तींची यादृच्छिक झडती घेतली जाईल. तसेच ग्राऊंड इंटेलिजन्स नेटवर्क सक्रिय करण्यात आले आहे. संवेदनशील भागात गस्त वाढविण्याचे आदेशही देण्यात आले आहेत.

Delhi Red Fort Bomb Blast : संपूर्ण परिसर रिकामा केला
ज्या ठिकाणी हा स्फोट झाला ते ठिकाण लाल किल्ल्यापासून फक्त 800 मीटर अंतरावर आहे. त्यामुळे सुरक्षा यंत्रणांनी हा संपूर्ण परिसर रिकामा केला. या ठिकाणी अग्नीशमन दल पोहोचलं असून लागलेली आग आटोक्यात आणण्यासाठी ते प्रयत्न करत आहेत. तसेच या ठिकाणी एनएसजीचे वरिष्ठ अधिकारीही दाखल झाले आहेत. त्याचसोबत फॉरेन्सिक टीमही या ठिकाणी दाखल झाली असून ते पुरावे गोळा करण्याचं काम करत आहेत.

गेल्या चार दिवसात, म्हणजे 7 नोव्हेंबर ते 10 नोव्हेंबर या दरम्यान दिल्लीमध्ये काही दहशतवाद्यांना अटक करण्यात आली आहे. त्यामुळे दिल्लीमध्ये झालेल्या या स्फोटाकडे गांभीर्याने पाहिलं जात आहे. दिल्लीमध्ये झालेल्या या स्फोटानंतर संपूर्ण दिल्लीमध्य हाय अलर्ट जारी करण्यात आला आहे. त्याचसोबत आर्थिक राजधानी मुंबईमध्येही हाय अलर्ट जारी करण्यात आलं आहे.